Jafningjafræðslan
Þriðjudagur, 20. September 2011 09:14
Í sumar heimsótti Ástráður jafningjafræðsluna líkt og undanfarin ár. Kristín Dóra Ólafsdóttir jafningjafræðari skrifaði í kjölfarið þessa grein um kynfræðslu á Íslandi. Í greininni veltir hún upp ýmsum punktum sem gott er að velta fyrir sér.
Ekki stunda kynlíf, þá færðu kynsjúkdóm og deyrð!
„Don‘t have sex or you will die“
Þegar við sjáum um unglingamyndir frá Hollywood nú á dögum sjáum við oft dæmi um „sex education“ sem myndi útleggjast á íslensku kynlífsfræðsla eða einfaldlega kynfræðsla. Oft má sjá mjög vandræðalega íþróttakennara sem eru að fræða unglinga með krít og krítartöflu að vopni. Þarna sjáum við aðstæður sem eru pínlegar fyrir alla málsaðila. Sjónarhorn kennarans er líka þannig að kynlíf sé slæmt og valdi jafnvel dauða. Þetta getur verið mjög fyndið, en er þetta svo fjarri raunveruleika íslenskra unglinga í dag?
Kynfræðsla í grunnskólum landsins hefur oftar en ekki farið fram með mjög svipuðum hætti. Þar eru aðalatriði fræðslunnar getnaðarvarnir og kynsjúkdómar sem gætu smitast ef smokkurinn gleymist. Einnig er oft farið í gegnum meðgöngu og fæðingu. Ég veit ekki með ykkur en ég var ekki mikið að pæla í barneignum þegar ég var fjórtán að verða fimmtán ára. Þetta er alltof oft tilfellið í svona fræðslum, að einblínt er á slæmu hliðar kynlífs og hvað ber að forðast í stað þess að benda á að kynlíf á að vera fallegt.
Ég veit þó að Ástráður, forvarnarstarf læknanema, hefur verið að hjálpa ungmennum að ræða þessa hluti og gefa svör við spurningum þeirra. Það er frábær þróun en því miður fá ekki allir þá fræðslu þar sem hún er ekki hluti af námskrá skólanna. Það mætti samt efla svona fræðslur sem eru innan skólanna til muna til dæmis með því að fá aðila inn í skóla sem eru menntaðir í þessum fræðum. Viðhorfi fullorðinna til unglingakynlífs þarf líka að breyta ef framfarir eiga að verða. Mér finnst allt of mikið einblínt á það ljóta við kynlíf og aldrei er talað um kynlífið sjálft, hvað er viðeigandi og hvað ekki. Unglingar vilja meira vita um hvernig kynlíf er stundað heldur en hversu miklar líkur eru á því að fá lekanda eða sárasótt.
Auðvitað má ekkert sleppa kynsjúkdómum alveg út úr svona fræðslum, en minnka þarf vægi þeirra og taka þá úr forgrunni. Samskipti lærast ekki af sjálfu sér og þarf nauðsynlega að fræða unglinga, bæði stelpur og stráka, um tilfinningar í kynlífi. Það væri hægt að tækla með því að búa til eina alhliða unglingafræðslu þar sem unglingar fá kennara sem hafa sjálfir fengið þjálfun og eru tilbúnir að svara spurningum og eru óhræddir við að segja orðin typpi og píka. Það að fá kynfræðslu í formi danskrar teiknimyndar fá níunda áratugnum (eins og ég fékk) telst varla með og er ekki boðlegt.
Nú er ég af klámkynslóðinni með klám allt í kringum mig og fæ þar af leiðandi hugmyndir í kollinn um kynlíf og kynhegðun sem kynslóðirnar á undan mér sluppu við. Það þarf nauðsynlega að gera grein fyrir muninum á kynlífi og klámi, sem á það til að ruglast saman, sérstaklega í grunnskólakynfræðslu.
Ef ég fengi að segja eitt við alla þá fjölmörgu einstaklinga sem eru að fræða unglinga í dag þá myndi það vera; „Hvernig getur eitthvað svona fallegt orðið svona ofboðslega dónalegt?“
KYNHVÖT í apríl
Þriðjudagur, 03. Maí 2011 18:07
Af og til heldur Ástráður svokallaða KYNHVÖT (Kynningar- og hvatningarkvöld ötulla táningafræðara) til að hvetja læknanema áfram í starfinu og fræða þá um valin málefni.
Síðasta KYNHVÖT var haldin 14. apríl á Háskólatorgi þar sem Einar Þór Jónsson, framkvæmdastjóri HIV-Ísland, ræddi við okkur um stöðu HIV-mála á Íslandi í dag og Hrafnkell Stefánsson, 6. árs læknanemi, talaði um reynslu sína af starfi á Göngudeild húð- og kynsjúkdóma.
Að lokum voru vegleg verðlaun veitt þeim læknanemum sem duglegastir voru í starfinu í vetur.
 |
Einar Þór Jónsson, framkvæmdastjóri HIV-Ísland. |
 |
Hrafnkell Stefánsson, 6. árs læknanemi. |
 |
| Helga Þráinsdóttir og Andri Leó Lemarquis, 2. árs læknanemar. |
 |
| Margrét Edda Örnólfsdóttir og Elías Sæbjörn Eyþórsson, 2. árs læknanemar. |
Starfsárið 2010-11
Fimmtudagur, 14. Apríl 2011 12:03
Ástráður hefur ekki setið auðum höndum þetta árið frekar en þau fyrri. Starfsárið hefur verið sérstaklega skemmtilegt fyrir okkur læknanemana sem spjöllum við unglingana og vonum við að þeir hafi haft gagn og gaman að fyrirlestrunum.
Starfsárið 2010-11 hélt Ástráður:
- 156 fyrirlestra í 28 framhaldsskólum vítt og breitt um landið
- 45 fyrirlestra í 22 grunnskólum og félagsmiðstöðvum
Við viljum koma á framfæri þökkum til alls þess frábæra fólks sem tekið hefur á móti okkur í vetur og séð til þess að nemendur sínir fengju fræðslu um kynlíf og kynheilbrigði.
-Ástráður
Kynstrin öll
Síðast uppfært: Fimmtudagur, 14. Apríl 2011 12:48 Mánudagur, 11. Apríl 2011 21:57
Ástráður vill vekja athygli á borðspilinu Kynstrin öll. Fátt er jafnmikilvægur né jafnumtalaður þáttur í lífi mannsins og kynlífið og hefur Jóna Ingibjörg Jónsdóttir, kynfræðingur, skapað spil sem hentar jafnt ungum sem öldnum um það málefni. Ástráður hefur nú í áratug sinnt kynfræðslu ungmenna á Íslandi og haft það að markmiði að koma á framfæri upplýsingum og vekja umræður meðal ungs fólks um kynheilbrigði. Kynstrin öll er tilvalið spil til að bæta samskipti og efla umræðu meðal unglinga og einnig á milli unglinga og foreldra. Spilið tengir á skemmtilegan hátt allt milli himins og jarðar sem kemur að almennum kynferðismálum. Spilið er hreint ekki vandræðalegt þar sem það byggist ekki á því að fólk segi frá eigin kynlífsreynslu heldur ræði um kynlíf almennt, hvað getur verið skemmtilegra en það! Spilið er spurningaspil með fimm flokkum; menning, sambönd, kynhegðun, líkaminn og taka sénsinn og oftast er stutt í hláturinn í hverjum flokki. Spilið er fjölfræðilegur upplýsingabanki sem vekur upp skemmtilegar og forvitnilegar umræður jafnt sem rökræður. Spilið er það fyrsta sinnar tegundar á Íslandi.
Kynstrin öll er með sanni fjör í orði og á borði og Ástráður hvetur alla til að kíkja á heimasíðu spilsins: www.kynstrinoll.is
Ástráður hélt spilakvöld fyrr á árinu og hér má sjá dæmi um það sem læknanemar höfðu um spilið að segja:
,,Skemmtilegt og fræðandi spil fyrir ungt fólk á öllum aldri”
„Kynstrin öll er alveg frábært spil! Það er skemmtilegt, fræðandi og býður upp á fjörugar umræður – allt í senn. Spilið er líka svo nýtt og ferskt, öðruvísi en öll hin spilin. Við hlógum mikið og skemmtum okkur konunglega!“
„Kynstrin öll er fyndið og fræðandi spil. Eitthvað sem allir með kynfæri ættu að prófa!“
„Það sem kom mér mest á óvart var hvað spilið skapaði góðan anda fyrir opna og jákvæða umræðu um kynlíf.“
,,Spilið var skemmtilegt og öðruvísi, á góðan hátt. Ég myndi segja að þetta væri í raun fyrir alla, kannski aðallega ungt fólk og örugglega mjög sniðugt fyrir unglinga, til að minnka fordóma og auka skilning á þessu "tabú" máli.”
,,Kynstrin öll er umfram allt skemmtilegt spil, sem fjallar um kynlíf á heilbrigðan hátt.”
,,Kynstrin öll kom mér virkilega á óvart. Ég hef sjaldan haft jafn gaman af borðspili. Spilið vakti skemmtilegar umræður og það var mikið hlegið í hópnum.”
Kveðja, Ástráður
Einkenni kynsjúkdóma
Fimmtudagur, 17. Mars 2011 20:51
Nýverið var sett upp yfirlit yfir einkenni ýmissa kynsjúkdóma á heimasíðu Landlæknis. Yfirlit sem þetta er ágætt viðmið og ætti að geta auðveldað fólki að átta sig á hvort um kynsjúkdómasmit sé að ræða og það leitað sér lækningar í framhaldi. Hins vegar er aðeins um viðmið að ræða og ef fólk er í vafa ætti það alltaf að leita til læknis.
Tengill á yfirlitið er kominn á síðuna.
Kveðja, Ástráður
Fleiri greinar...
Síða 1 af 2
